Шаноўныя браты і сёстры, прыкладам малітвы за Беларусь для нас могуць быць малітва Кірылы Тураўскага за Вялікае Княства, малітвы Святога Паўла «за ўсіх чалавекаў», малітва Йонги Чо за Карэю, а таксама малітвы прарокаў Старога запавету за старажытны Божы народ.
О, Госпадзе! Зрабі мяне зброяй Твайго свету. Каб я і там праяўляў любоў, дзе мяне ненавідзяць!
Каб я прабачаў, дзе мяне крыўдзяць, каб я злучаў, дзе пануе сварка; каб я казаў праўду, дзе памыляюцца; каб я веру прыносіў, дзе цісне сумненне.
Каб я надзею абуджаў, дзе мучыць адчай; каб я святло запальваў там, дзе пануе цемра; каб я радасць даваў, дзе жыве смутак.
О, Госпадзе, дай мне імкнуцца да таго, каб не я чакаў суцяшэння, але каб я суцяшаў; каб не я чакаў разумення ад іншых, але я іх разумеў; каб не я чакаў любові, але я любіў.
Госпадзе, дай мне з душэўным спакоем сустрэць усё, што прынясе мне надыходзячы дзень.
Госпадзе, дай мне поўнасцю аддацца Тваёй святой волі.
Госпадзе, у кожнае імгненне гэтага дня ва ўсім навучай і падтрымлівай мяне.
Госпадзе, адкрый мне волю Тваю для мяне і маіх блізкіх.
Госпадзе, якія б весткі я не атрымліваў на працягу дня, дай мне ўспрыняць іх са спакойнай душою і цвёрдым перакананнем, што на ўсё ёсць святая воля Твая.